تام عشق
چ مانگە شەوێ بی، شەو پڕ هەسارە
شەوێ گ خەنیمن، ڤە تە دڵ دووارە
شەو باخ و کووڵا، پڕە یاس و شەوبوو
شەو تەعنە عەترت، ڤە پۊنەیل لێو جوو
شەو ئاو و ئاگر، شەو مەیل و میڤە
شەو بێ ستاری۱، دو شەوگەرد لێڤە
خوەر عشق بیت و ڤە کەل کێو دراتی
ڤە باشوور هاتم ڤە ئاسوو دراتی
گلەیل ئەنگۊرە چەوەیل تو مەس بین
چنارەیلە شەوق تو دەسماڵە دەس بین
م بێ دین و کافر، تو ئاگر پەرەس بیت
م پەێ جوور گەنج و تو ڤە دەس بڕەس بیت
دوبەیتی ڤە لێڤ و غەزەڵ ڤە ڤەرت بی
چۊ مانگ ئاخڵەێ۲ نۊر، ڤە دەور سەرت بی
کراس زەمین بی، پڕە کاو خوەش رەنگ
چیا چیل۳ و بێ چڵ۴، چەمەن چووڵ و بێ دەنگ
کەژ۵ کاو شەو بی، کراس من و تو
سێو۶ سروە پڕ ڤە هەناس من و تو
شەوێ گ خودا عشق،دیار سەرم بی
خڵێف دەسەیلت،خڵات ڤەرم بی
بڵێزەت هەڵسیا، ئەنامەت کەتە گڕ
م یەێ بافە کاو پۊش۷، تو یەێ کوومە ئاگر
رشا شان و مل م،هەڵاو هەناسەت
عەرەخ کرد و وا بی، گوڵ سوور تاسەت
چەنێ شیف شەوبوو، تەڤەس۸ دا گیانمان
مەسی عشق تامێ،چیە پا دنانمان
زەمان خەێوش۹ بەێوش۱۰ و زەمین کاڵ گوڵ بی
گڕێ۱۱ داڵ بوڵبوڵ، گڕێ داڵ گوڵ بی
۱۳۹٥/٤/۲٥
___________________________________________
۱-بێ ستاری=بی فراری
۲-ئاخڵە= هاله
۳-چیل= خال خال
۴-بێ چڵ= بی هیچ زائدەای،دراینجا به معنی بی هیچ مزاحم وبرهم زننده آرامش کوه
۵-کەژ= توری،حریر
۶-سێو= شش،پفی
۷-کاوپۊش= نوعی علف بسیار ظریف که خشک شده اش دربرابر آتش بسیار ظعیف است
۸-تەڤەس= جوانه هایی که دورترازدرخت برروی ریشه اش میرویند.
۹-خەێوش=مدهوش
۱۰-بەێوش= شادی وذوق کردن
۱۱-گڕێ= لحظه ای
درباره این سایت